10. De sancto Martyre

vel Confessore.

1 Psallens Deo, Sion, gaude

Laeta voce, digna laude

Concinens praeconia;

2 Celebretur in hac die
Famulatu plebis pie
Martyris memoria.

3 Oret ipsum omnis homo,
Ut mereri lucis domo
Vitae possit praemia.

4 Psalle, psalle, plebs devota,
Puro corde, mente tota
Summa dans tripudia.

5 Ave, martyr pretiose,
Sedis consors gloriosae,
Sanctis par in gloria ;

6 Ferens nobis spem salutis
Lava labem a pollutis
Mali data venia.

7 Foedae carnis luxus pelle
Et purgato cordis felle
Deo nos concilia ;

8 Funde preces pro peccatis,
Notam dele pravitatis
Et mentem irradia.

9 Sana morbos et languores,
Cura pestes et dolores
Et fuga daemonia;

10 Placens Deo placa Deum,
Ne condemnet plasma reum
Carnis post exitia.