7. De sanctis Evangelistis.

1 Iucundare, plebs fidelis,
Cuius pater est in caelis,
Recolens Ezechielis
Prophetae praeconia;

2 Est Johannes testis ipsi
Scribens in apocalypsi:
"Vere vidi, vere scripsi
Vera testimonia".

3 Circa thronum maiestatis
Cum spiritibus beatis
Quattuor diversitatis
Astant animalia:

4 Formam primum aquilinam
Et secundum leoninam,
Sed humanam et bovinam
Duo gerunt alia.

5 Formae formant figurarum
Formas evangelistarum,
Quorum imber doctrinarum
Stillat in ecclesia ;

6 Hi sunt Marcus et Matthaeus,
Lucas et, quem Zebedaeus
Pater misit tibi, Deus,
Dum laxaret retia.

7 Formam viri dant ''Matthaeo,
''Quia scripsit sic de Deo,
Sicut descendit ab eo,
Quem plasmavit, homine.

8 Lucas bos est in figura,
Ut praemonstrat in scriptura
Hostiarum tangens iura
Legis sub velamine.

9 Marcus leo per desertum
Clamans rugit in apertum,
Iter fiat Deo certum,
Mundum cor a crimine.

10 Sed Iohannes ala bina
Caritatis aquilina
Forma fertur in divina
Puriori lumine.

11 Quattuor describunt isti
Quadriformes actus Christi
Et figurant, ut audisti,
Quisque sua formula:

12 Natus homo declaratur,
Vitulus sacrificatur,
Leo mortem depraedatur
Et ascendit aquila.

13 Ecce, forma bestialis,

Quam scriptura prophetalis
Notat, sed materialis
Haec est impositio ;

14 Currunt rotis, volant alis:
Visus sensus spiritalis,
Rota gressus est aequalis,
Ala contemplatio.

15 Paradisus his rigatur,
Viret, floret, fecundatur ;
His abundat, his laetatur
Quattuor fluminibus ;

16 Fons est Christus, hi sunt rivi,
Fons est altus, hi proclivi,
Ut saporem fontis vivi
Ministrent fidelibus.

17 Horum rivo debriatis
Sitis crescat caritatis,
Ut de fonte Deitatis
Satiemur plenius ;

18 Horum trahat nos doctrina
Vitiorum de sentina
Sicque ducat ad divina,
Ab imo superius.