36. In Dedicatione Ecclesiae.

1 Ecclesiae desponsato
Laudum summi patris nato
Decantemus carmine,

2 Hanc qui sibi desponsavit
Atque sui fabricavit
Lateris ex sanguine,

3 Ut ex Adam quondam costis
Evam fabricatam nostis
Soporis in requie.

4 Dum ex lignis arcam scidit,
Huius Noe tunc praevidit
Figuram ecclesiae ;

5 Quam ex lignis sanctae crucis
Fabricavit auctor lucis

Ad salutem omnium,
Per hanc omnes quoniam creduli
Supernatant istius saeculi

Flebile diluvium.

6 Auri nitor et gemmarum
Opus arcae fecit clarum,
Quam Moyses edidit)
In qua legis tabulam,
Urnam, manna, virgulam
Florentem recondidit.

7 Gemmis sic virtutum crescit
Templum nostrum ac splendescit
Auro sapientiae,

8 In quo legem summi regis,
Urnam vini, panis legis,
Florem virgae Mariae.

9 Arcam peccatorum mundat
Cruor Christi, sanguis undat
Hoc templum cottidie ;

10 Per hoc caelum quod intratur,
Exsul Iacob contemplatur
Scalae sub effigie.

11 Haec regina, David teste,
Aurata, polita veste
Dei stat ad dexteram:

12 Haec Christi stupescens bonis
Iesu, veri Salomonis,
Sophiae dat operam.

13 Hoc Iohannes contemplatur,
In hac plene coniungatur
Quod sponsus ecclesiae,

14 Qui nos suo commensali
Det in veste nuptiali
Coniungi praescentiae.

15 Matris huius nos renatos
Sacramentis tibi gratos
Fac, pater clementiae,

16 Nec, ut olim mercatores,
Nos excludas peccatores
Foribus ecclesiae.

17 Huius, o compago laris,
Christe, lapis angularis,
Fac nos sic hic vivere,

18 Ut possimus in illa te
Sine fine civitate
Superna conspicere,

19 In qua non insidiatur
Fraus nec ira comminatur
Nec dolus iniuriatur
Cuiquam vel invidia,

20 Sed frequenter sollemnizat.
Iucundatur, symphonizat
Ac tibi laudes hymnizat
Tota caeli curia ;

21 In qua chorus prophetarum,
Contio patriarcharum
In tuum vultum praeclarum
Mentis figunt aciem,

22 Hauriunt te sitiendo,
Fruuntur esuriendo,
Cernunt non fastidiendo
Tuam semper faciem.

23 Ibi pexpes lux diescit,

Nec quis maeret, nec languescit,
Nec terretur, nec senescit,
Sed prorsus eclipsin nescit
In tui praesentia;

24 Ubi gaudet cum Maria
Sanctorum cohors tam pia
Atque triplex ierarchia
Coram sua monarchia
Per aeterna spatia.

De Sanctis.