5. De sanctis Apostolis.

1 Cuius laus secundum nomen,
eius est et gloria

2 Et in universa terra,
qua sua iudicia

3 Timet reus iudicandus
teste conscientia,

4 Amat iustus liberandus
eius sola gratia.

5 Haec tamquam abyssus multa
sunt inscrutabilia ;

6 Sed de Deo natus Deus,
Dei sapientia,

7 Nos ex alto visitavit
et venit in propria,

8 Factus homo, qui narravit
nobis haec et alia,

9 Quae latebant in figuris
occulta mysteria.
Stulta quoque mundi Deus
et contemptibilia

10 Sublimavit dignitate,
praefecit potentia,
Qui ubique praedicarent
eius testimonia.

11 Hi sunt caeli continentes
secreta caelestia;

12 Hi sunt nubes, unde manat
doctrinarum pluvia ;

13 Hi sunt templi fundamenta,
sunt portae, sunt atria ;

14 Sunt bases atque columnae,
quibus stat ecclesia;

15 Sunt lux mundi, verbo, vita
illustrantes omnia ;

16 Sunt sal terrae, condientes
morum temperantia ;

17 Sunt pastores, populorum
servantes ovilia ;

18 Sunt doctores, subditorum
exercentes studia.

19 Horum ergo flagitemus
omnes patrocinia,

20 Ut cum ipsis gloriemur
in caelesti patria.