21. De sancto Confessore.

1 Felix sancti transitus,
Cuius finis inclitus
Vitae fit initium ;

2 Huius menti primitus
Suggessit paraclitus
Declinare vitium.

3 Hic sacro spiramine
Praeventus a crimine
Liber mundum respuit;

4 Allectus dulcedine
Christi cum conamine
Ipsum sequi studuit.

5 Caritate maxima
Sui cordis intima
Ferbuere dulciter ;

6 Mente serenissima
Quaesivit humillima
Christo duce iugiter.

7 Offerendo nitidum
Christo cor et fervidum
Ac salutis hostiam,

8 Incedens per solidum
Iter ac perlucidum
Transiit ad gloriam.

9 Ornatum virtutibus
Signis mirabilibus
Hunc declarant opera.

10 Christus suis precibus
Nobis in caelestibus
Donet vitae munera.