96. De sancto Blasio.

1 Iucundare, plebs fidelis,
Iucundatur iam in caelis
Christi martyr, Blasius,

2 Qui in regno claritatis
Speculum divinitatis
Contemplatur clarius.

3 Cultor verus verae legis,
Pacis norma, forma gregis,
Fit athleta summi regis,
Signifer egregius.

4 Medicinae non ignarum
Dogma docet magis clarum
Pater Deus, animarum
Curam dans uberius.

5 Quadratura fundat pectus,
Ne labascat uspiam,
Pius, prudens, fortis, rectus
Suis dat constantiam.

6 Ut providit ergo Deus
Solita clementia,
Fit antistes Sebasteus
Omni plenus gratia.

7 Tortor rapax quaerit eum,
Ut negare cogat Deum,
Vel trucidet quasi reum;

8 Cernens mentem non mutari,
Primo iubet flagellari,
Dure post haec carcerari.

9 Solvit a spina pueram,
Cogit et lupum efferum
Reportare
Porcum raptum pauperculae

10 Eius edoctae studio
Deos norunt ludibrio
Pessum dare
Septenae mulierculae.

11 Pugnat fortis contra fortem
Agnus lupo fortior;

12 Poenas calcat, spernit mortem
Inter damna laetior.

13 Pecten hunc carpit ferreus,
Humor huic servit aqueus,
Idolatra submergitur.

14 Cambit vitam sub gladio,
Bino dotatur lilio,
Caelum dives ingreditur.

15 Ergo, martyr o beate,
Tibi melos psallimus ;
Da, ne separemur a te,
Toto corde poscimus.

16 Tu, patrone atque tutor
Hac valle miseriae,
Sis defensor et adiutor
Psallentis familiae,

17 Ut a taetris liberari
Tartareis suppliciis,

18 Paradisi sociari

Mereamur gaudiis.