49. De sancto Africano.

1 Admiranda et favoris
Digna dies oritur ;

Celebranda cunctis horis
Vita sancti panditur

Africani, confessoris,
Cuius festum colitur.

2 Romae iacens in erroris
Cultu plebs erigitur

Verbo tanti protectoris,
Haeresis depellitur,

Alti dono creatoris
Antistes efficitur.

3 Ortu claro Burgundensis
Mira laude floruit,
Quem doctrina Lugdunensis

Praesulis sic imbuit,
Ut ecclesiae fulgentis
Primatum tenuerit.

4 Dux electus Ruthenensis
Locum hunc obtinuit,

Orans laudibus immensis
Laureari meruit,

Cernentibus non offensis
Angelus apparuit.

5 Sed Deus fidem infundens

Africano, foedera
Arianorum subvertens

Horum fugat scelera,
Unde victorem extollens

Erexit ad sidera.

6 Quidam ficte curvans manum
Pia petit munera,
Punitur et Africanum

Voce petit libera,
Quem reddens omnino sanum
Evexit ad prospera.

7 Gaude, Sion, Africani
Praedita praesidio,

Laudes profer iucundandi
In caeli palatio

Eiusque dulcisonanti
Exsulta praeconio.

8 Gaude, plebs universalis,
Funde preces hodie,
Hunc collauda mente pari

Rectorem ecclesiae,
Qui meruit coronari
Fulgoribus gloriae.