61. De sancta Anna.

1 Gaude, mater Anna, gaude,
Mater omni digna laude,
Mater tantae filiae!

2 Anna recte nuncupans,
Quia gratiosa paris
Matrem omnis gratiae.

3 Anna parit tres Marias,
Quarum primam Isaias
Praedixit divinitus,

4 Virgam florem producturam
Virginemque parituram
Dono sancti Spiritus.

5 Haec est radix Anna pia,
Virga florens est Maria,
Christus flos est inclitus.

6 Digna radix est honore,
Cuius virga tali flore
Fecundatur caelitus.

7 Anna stellam matutinam,
Stellam maris et reginam
Peperit clementiae,

8 Cum qua vere iam laetatur,
Quia Deum contemplatur
Revelata facie.

9 Salve, mater matris Christi,
Quae iam felix conscendisti
Iubilans ad aethera.

10 Iter nobis para tutum,
Ut in Domini virtutum
Collocemur dextera.