31. In Dedicatione Ecclesiae.

Ascribitur Adamo de S. Victore.

1 Rex Salomon fecit templum,
Quorum instar et exemplum
Christus et ecclesia:

2 Huius hic est imperator,
Fundamentum et fundator
Mediante gratia.

3 Quadri templi fundamenta
Marmora sunt, instrumenta
Parietum paria.

4 Candens flos est castitatis
Lapis quadrus in praelatis,
Virtus et constantia.

5 Longitudo,
Latitudo
Templique sublimitas

6 Intellecta
Fide recta

Sunt fides, spes, caritas.

1 Sed tres partes sunt in templo
Trinitatis sub exemplo:
Ima, summa, media ;

8 Prima signat vivos cunctos,
Et secunda iam defunctos,
Redivivos tertia.

9 Sexagenos quaeque per se
Et ter tantum universae
Habent lati cubitos ;

10 Horum trium tres conventus
Trinitati dant concentus
Unitati debitos.

11 Templi cultus
Exstat multus:
Cinnamomus
Odor domus,
Murra, stactis, cassia.:

12 Quae bonorum
Decus morum
Atque bonos
Precum sonos

Sunt significantia.

13 In hac casa
Cuncta vasa
Sunt ex auro
De thesauro

Praeelecto penitus;

14 Nam magistros
Et ministros
Decet doctos
Et excoctos
Igne sancti spiritus.

15 Sic ex bonis
Salomonis,

Quae rex David
Praeparavit,
Fiunt aedificia;

16 Sed in lignis
Rex insignis
Iuvit Tyri,
Cuius viri
Tractant artificia.

17 Nam ex gente Iudaeisque,
Sicut templum ab utrisque,
Conditur ecclesia.

18 Christe, qui hanc et hos unis,
Lapis huic et his communis,
Tibi laus et gloria I