16. De sancto Confessore.

1 Crebrescente Christi laude
Consolata, Sion, gaude,
Toto nisu, plebs, adplaude-
Tamquam patri filia ;

2 Laudes promas non exiles,
Quia sprevit Christi miles
Opes huius mundi viles
Pro caelesti gloria.

3 Hostem certans debellavit
Et certamen consummavit,
Pro quo Christus hunc ditavit
Corona perpetua.

4 Ab aetate primitiva
Carnis vicit incentiva,
Quia caro, licet viva,
Mundo fuit mortua.

5 Ergo mundi sorte spreta
Iubilemus mente laeta
Summo regi cum athleta,
Cuius festum colitur,

6 Ut pro nostra peritura
Vita detur, sed secura,
Ubi merces pro mensura
Meritorum redditur.