48. De sancta Afra.

1 Chorus noster Iactabundus
In honore sit iucundus
Afrae, sanctae martyris,

2 Quam de faece peccatorum
Christus purgans iam sanctorum
Sociavit meritis.

3 Haec longinquam regionem
Sibi facit mansionem
Mortis tecta pulvere ;

4 Abit, locum non mutando,
Sed a Deo declinando
Foedo carnis opere.

5 Haec a patre sibi data
Portione dissipata

Cibum quaerit misere ;

6 Rationis et naturae
Res consumens eget, durae
Famis pressa pondere.

7 Gregem pascit haec porcorum
Foeditates vitiorum
Confovendo nutriens.

8 Stola prima decoratur,
Dape dulci saginatur
Paenitendo rediens.

9 Prudens praedicator missus,

Vir fidelis, dum Narcissus

Verbi spargit semina,

10 Ovis errans invenitur,
Dragma dena reperitur
In conversa femina.

11 Ad credendum

cor inclinat
Praesul, ei dum propinat
Condimenta fidei ;

12 Pro qua flammis

consummatam
Rex caelestis purpuratam
Ad se fecit provehi.

13 Intus pulchre redimita,
Domum patris haec oblita
Pariterque populum

14 Est a rege concupita,
Cum quo, poenis expolita,
Permanet in saeculum.

15 Cuius dextri sunt amplexus,
Non habentes vitae nexus,
Manu nexi regia ;

16 Quorum gustu delectatur
Quorum nexu iucundatur
Martyr haec egregia.

17 Huius interventione
De longinqua regione
Tua, Deus, gratia

18 Nos, precamur, det redire
Et purgatos pervenire
Tua in palatia.