24. De sancta Virgine.

1 Virgines egregiae,
Virgines sacratae,
Coram vestri facie
Sponsi decoratae,

2 In aeterna requie
Sursum sublimatae,
Canticum laetitiae
Domino cantate !

3 Castitatis lilium
Olim custodistis
Propter Dei filium,
Cui placuistis;

4 Templum sancti Spiritus
Esse voluistis,
Tactus et concubitus
Ideo fugistis.

5 Flore pudicitiae
Vestrae reservato,
Carnalis lasciviae
Motu refraenato,

6 Debito munditiae
Praemio donato
Assidetis sociae
Virginali nato.

7 Non estis de fatuis,
Quae cum vasis vacuis
Sponsum praestolantur,

8 Immo de prudentibus,
Quae plenis lampadibus
Bene praeparantur.

9 Fatuis virginibus,
Oleo carentibus,

Sponsus est dicturus:

10 Vobis non aperiam,
Prudentes recipiam
Praemium daturus.

11 O tu virgo veneranda,
Cuius festa celebranda
Redierunt annua,

12 Casta, prudens et fidelis.

Impetrare nobis velis

Gaudia perpetua.