8. De sanctis Evangelistis.

1 Ortum sacrum tui, Christe,

Scripserunt evangelistae,

Quorum totus orbis iste

Scripturis instruitur.

2 Haereticorum sophistae,
Philosophi vel artistae
Stupent, quorum dogma triste
Per eos eliditur,

3 Ad firmandum cor sincerum
Plebem rudem atque clerum
Sacrarum profunda rerum
Quos scripsisse legimus.

4 Per figuras facierum,
Quas vidit una dierum
Propheta per lumen verum,
Designari novimus ;

5 Humana Levi, bovina
Lucam, Marcum leonina,
Sed Iohannem aquilina
Designavit proprie.

6 Tres primi contemplando legem
Hominem, hostiam, regem,
Agnum, qui redemit gregem,
Ostendunt egregie.

7 Omnes aquila transcendit,
Dum ad divina conscendit
Et, sicut erat, ostendit
Verbum in principio.

8 Horum verbo salutari
Fide firmi, Deo cari
Mereamur gloriari
Cum eis in gaudio.