60. De sancta Anna.

1 Luce lucens in aeterna,
Lucis ductrix et lucerna,
Claritatis gerula,

2 Felix Anna, de caverna
Laci transfer ad superna
Lucis nos vehicula.

3 Mundi iubar luminare
Novum paris sine pare,
Sole plus illuminans ;

4 Ex te duxit ortum clare
Maris stella, per hoc mare
Spatiosum rutilans.

5 Orta stirpe de regali
Super ortum speciali
Gaudes privilegio

6 Prole fulgens sola tali,
Quali nulla de mortali
Sexu vel collegio.

7 Cella vere tu caelestis,
In qua trinitatis vestis
Est ordita primitus ;

8 Huius rei caro testis
Exstat Christi, quam in festis
Gestat iam caelestibus.

9 Carnem tuam carnem Christi
Per Mariam, quam tulisti,
Recta probat linea,

10 Qua cum Deo contraxisti
Genus, omnes ac vicisti
Nata cum virginea.

11 Tu terminus tristitiae,
Scaturigo laetitiae,

Quae prolem benedictam

12 De gremio das gratiae,
Matrem solis iustitiae
Labe prorsus invictam.

13 Tua grandis
est potestas,
Tibi caeli dat maiestas
Matronatus gloriam.

14 Ad tranquillum,

quos tempestas,
Ad fluentem, quos egestas
Urget, trahe copiam.

15 Eia, mater plena bonis,
Gratiarum dita donis
In praesenti pauperes;

16 Huius cursum post agonis
Salvandorum nos in thronis
Loca donis uberes.

17 Iesu, dulce solacium,
Te, paternalem radium,
Lucis in fonte rubilo

18 Da praecinente canticum
Anna cum nata caelicum
Videre pleno iubilo.