66. De sancta Anna.

1 Exsultet ecclesia
Pro assumpta filia
Regis ad palatium.

2 Annae sublimatio
Nostra exsultatio,
Nostrum est convivium.

3 Regni tenet solium,
Diadema regium
Per Mariae filium.

4 Praesentatur hodie
Anna regi gloriae

Cum hymnis et laudibus.

5 Haec Mariam peperit,
Per quam Christus aperit
Sinum paenitentibus.

6 Datur in caelestibus
A sanctorum civibus
Annae salutatio,
Iucunda laudatio.

7 Laudant matris viscera,
Laudant matris ubera,
Fructum beatificant,
Mariam magnificant.

8 Felix Anna,
Ex te manna
Mundo datur,
Quo pascatur
In deserto populus ;

9 Hoc dulcore,
Hoc sapore
Sustentatur,
Procreatur
Ex manna vermiculus.

10 Vermem istum
Dico Christum,
Nobis natum,
Exaltatum

In crucis patibulo ;

11 Fit unguentum
Vulneratis,
Condimentum
Tribulatis,

Salvat a periculo.

12 Manna caeli, manna terrae,
Cura, stude nos transferre
Ad lactis, mellis patriam,
Ad paradisi curiam.

13 Mater Dei genetricis,
Mater nostrae salvatricis.
Per te praesens familia
Tecum regnet in gloria.

14 Nos commenda trinitati,
Fac, ut verbi incarnati
Servis suis
Atque tuis
Detur benedictio;

15 Fac, ut nostra symphonia
Et in regno et in via
Sit Maria,
Melodia,

Carmen, iubilatio.

16 Laus Mariae filio !