43. De s. Achatio et sociis.

1 O caelestis harmonia,
O superna ierarchia,
Iubilante melodia
Exsulta in gloria !

2 Psalle, Sion, omni laude,
Quia summus in te, gaude,
Circumieva visum, plaude,
Tota caeli curia !

3 Omnes isti congregati
Tibi venerunt beati,
Summo rege confirmati
Obtenta victoria ;

4 Isti de Edom venerunt
Et de Bosra se tinxerunt,
Stolas in agno laverunt
Per crucis martyria.

5 Fide fluens, corde mirans
Dilatare, circumgirans
Et contemplans et respirans
Martyrum tot milia !

6 Tibi maris multitudo
Nec non gentis fortitudo
Venit que beatitudo
Iungat nos ad gaudia.

7 Latro crucem toleravit,
Christo "Memento" clamavit,
Cui statim reseravit
Paradisi ostia ;

8 Sic nimirum conformavit
Hos sibi et adunavit,
Quos per crucem sublevavit
Ad festa perennia.

9 Summo regi convestiti,
Crucis armis communiti
Atque signis insigniti,
Conferte subsidia,

10 Ut post cursum huius vitae
Nostrae poenae sint finitae,
Iudex dicat: Advenite
Ad caeli palatia.