25. De sancta Virgine.

1 Fulget dies celebris,
Qua exuta tenebris
Et mundi illecebris,

2 Cuius sunt sollemnia,
Virgo haec ad gaudia
Migravit caelestia.

3 Haec est virgo sapiens,
Quae mundum despiciens
Et mundi blanditiem

4 Pro labore praemium,
Pro maerore gaudium
Possidet et requiem.

5 Felici commercio
Prudenter exsilio
Patriam praeposuit

6 Et per virtutum viam
Ad eandem patriam
Pertingere meruit.

7 O virtutum optima,
Angelis finitima
Corporis integritas
Et mentis virginitas !

8 Offensa concilians,
Disparata socians,
Angelos hominibus,
Aeterna mortalibus !

9 Per hanc solam
Multi stolam
Consecuti
Et induti

Sunt aeternae gloriae;

10 Haec est sola
Caeli schola,
Disciplina
Et doctrina

Caelestis militiae.

11 Hanc docuit,
Exhibuit
In homine
De virgine

Natus Dei filius,

12 Cuius ortus
Vitae portus,
Cuius mater
Virgo, pater

Feminae est nescius.

13 O felicem matrem illam,
Quae fatetur se ancillam,
Dei mater et filia,
Dei repleta gratia I

14 Quae contra naturae iura
Creatorem creatura,
Plasma suum principium,
Virgo peperit filium.

15 Hanc sacer chorus virginum
Imitatur, quae hominum
Despiciunt
Et fugiunt
Pro Christo conubia.

16 Huius adepta gloriam,
Aeternitatis patriam,
Virgo, gaudes,
Cuius laudes
Celebrat ecclesia.

17 Pro cuius victoria
Cantemus Alleluia !