17. De sancto Confessore.

1 Dulci corde iubilemus,
Voce plena consonemus,
Qua patronum honoremus
Beatum Aegidium.

2 Hic mundana contemnebat,
Deo totus inhaerebat,
Nam non ficte requirebat
Iesum, Dei filium.

3 Vere plenus caritate,
Vitae florens castitate,
Adornatus paupertate
Fit iudicum socius.

4 Mores probant sanctitatis,
Docent signa claritatis,
Quantae sit iam dignitatis
Iste vir egregius.

5 Eia, beate patrone,
Misereri semper prone,
Fac consortes nos coronae
Caelestis militiae.

6 Per te Christus nos coronet.
Per te nobis vitam donet
Voxque nostra grata sonet
Apud sedem gloriae.