30. In Dedicatione Ecclesiae.

1 Quam dilecta tabernacula
Domini virtutum et atria !

2 Quam electi
Architecti
Tuta aedificia,

3 Quae non movent,
Immo fovent
Ventus, flumen, pluvia !

4 Quam decora fundamenta
Per concinna sacramenta
Umbrae praecurrentia !

5 Latus Adae dormientis
Evam fudit in manentis
Copulae primordia.

6 Arcam ligno fabricatam
Noe servat, gubernatam
Per mundi diluvium.

7 Prole sera tandem feta
Anus Sara ridet laeta,
Nostrum lactans gaudium.

8 Servus bibit, qui legatur,
Et camelus adaquatur
Ex Rebeccae hydria ;

9 Haec inaures et armillas

Aptat sibi, ut per illas

Viro fiat congrua.

10 Synagoga supplantatur
A Iacob, dum evagatur
Nimis freta literae.

11 Lippam Liam latent multa.
Quibus videns Rachel fulta
Pari nubit foedere.

12 In bivio tegens nuda
Geminos parit ex Iuda
Thamar, diu vidua.

13 Hic Moyses a puella,
Dum se lavat, in fiscella
Reperitur scirpea.

14 Hic mas agnus immolatur,
Quo Israel satiatur
Eius tutus sanguine.

15 Hic transitur rubens unda,
Aegyptios sub profunda
Obruens voragine.

16 Hic est urna manna plena,

Hic mandata legis dena,

Sed in arca foederis.

17 Hic sunt aedis ornamenta,
Hic Aaron indumenta,
Quae praecedit poderis.

18 Hic Urias viduatur,
Bersabee sublimatur
Sedis consors regiae.

19 Haec regi varietate
Vestis astat deauratae,
Sic et regum filiae.

20 Huc venit Austri regina,
Salomonis quam divina
Condit sapientia.

21 Haec est nigra, sed formosn.
Murra et ture fumosa
Virga pigmentaria.

22 Sic futura,
Quae figura
Obumbravit,
Reseravit
Nobis dies gratiae.

23 Iam in lecto
Cum dilecto
Quiescamus
Et psallamus!

Assunt enim nuptiae,

24 Quarum tonet initium
Per turbas epulantium
Et finis per psalterium ;

25 Sponsum millena milia
Pari laudent melodia
Sine fine dicentia:

26 Alleluia.