34. In Dedicatione Ecclesiae.

1 Hierusalem, urbs beata,
Domus Deo dedicata,
Supra petram stat fundata.

2 Fundamentum angulare,
Quod et templum et altare,
Nemo potest alterare.

3 Agnus Dei, agnus Deus,
Ipse templum urbis eius,
In quo semper iubilaeus,

4 Non est dolor neque fletus
Neque mors nec mortis metus,
Ubi quisque regnat Iactus.

5 Urbs in quadro posita,
Tota Deo dedita
Iubilans in carmine ;

6 Urbs in orbe celebris,
Tota sine tenebris,
Rutilans in lumine.

7 Agnus lucet in commune,
Non lux solis neque lunae,
Qua non eget civitas;

8 Agnus urbis est lucerna,

Cuius una sempiterna

Dies est divinitas.

9 Luculenta
Fundamenta

Stant in sanctis montibus,

10 Stant securi
Miri muri

Vivis ex lapidibus.

11 Venti ruant,
Aquae fluant,
Muri stant in ordine,

12 Non terrentur
Nec moventur
Pluvia vel turbine.

13 Stant fundata sacramenta,
Stant sacrata fundamenta
Nec moveri poterunt.

14 Stant parietes civiles,
Tam Iudaei quam gentiles,
Unum sunt, non differunt.

15 Christus, noster salutaris,.
Ipse lapis angularis,
Fecit unum utraque ;

16 Christus cruce purpurata
Reddit omnia pacata,
Quae in caelo terraque.

17 Sion, Dei civitas,
Deo iam coliabitas
Velut sponsa nobilis ;

18 Sion, pacis specula,
Per aeterna saecula
Permanens immobilis !

19 Cuius rei gratia
Psallat haec ecclesia
Cum caeli militia;

20 Haec, illius aemula,
Sit in laude sedula,
Gratulans in saecula.