35. In Dedicatione Ecclesiae.

1 Ad honorem ecclesiae,
Cuius ornatum hodie
Celebramus sollemniter,

2 Resonet vox laetitiae,
Vox purae conscientiae
Christum laudans concorditer.

3 In manufactis aedibus
Et politis lapidibus
Adoramus te, Domine ;

4 Sed in caelorum sedibus
Cum sanctorum agminibus
Regnas in caeli culmine.

5 Nos ergo, qui te colimus,
Devoto corde poscimus
Laudes canentes debitas:

6 Remitte, quod peccavimus,
Da regnum, quod amisimus,
Ubi maior est caritas,

7 Ubi cives angelici
Et omnes chori caelici
Deum semper prospiciunt ;

8 Illicque prece supplici
Fac omnes tecum adici,
Qui digne tibi serviunt.