44. De sancto Adalberto Pragensi.

1 Hodiernae lux diei
Celebris martyris Dei
Agitur memoria.

2 Decantentur harmoniae,
Sonent cordis symphoniae,
Laudet Euterpia.

3 Iucundetur plebs Bohema,
Cui caeli misit dona
Christi providentia.

4 Praga plaudat in corona,
Quam confecit arte bona
Divina prudentia.

5 Flos est tuus Adalbertus,
Cuius color est repertus
Candens, vernans, germinans ;

6 Castitatis vi refertus,
Labem carnis inexpertus,
In candore terminans.

7 Florem rosae maritavit
Castitati, dum perlavit
Eius pectus lancea ;

8 Rore caeli suos pavit,
Quem Prussorum gens expavit
Nec admisit ferrea.

9 Salve, martyr, qui regressus
A Prussia figis gressus
In tua Bohemia.

10 Advocatus indefessus
Sis, ut nobis es concessus
A caelesti curia.