45. De sancto Aegidio abbate.

1 Congaudentes exsultemus,

Exsultantes celebremus

Aegidii sollemnia,

2 Qui triumphans de terrenis,

Coronandus in supremis

Summa petit gaudia.

3 Hunc insignem pietate,

Virum plenum sanctitate,

Stirpe natum regia,

4 Templum Deo mox futurum,

Mundo satis profuturum

Procreavit Graecia.

5 Qui in primo aevi flore,

Quantus foret in virore,

Praemonstravit gratia:

6 Data veste mendicanti

Confert diu languescenti

Salutis remedia:

7 Hinc post mortem genitorum

Plenus laude meritorum

Sua vendens omnia

8 Larga manu dat egenis

Egens ipse alienis,

Exsulat a patria.

9 Undis nautae fatigati

Portum petunt liberati

Per eius suffragia.

10 Medicina dum rogatur,

Sanitati revocatur

Vidualis filia.

11 Pellitur sterilitas,

Succedit fertilitas,

Surgit messis copia ;

12 Aegris reparatio

Pulso morbi vitio,

Maestis fit laetitia.

13 Ad deserta sitiens

Properavit, fugiens

Omnino consortia.

14 Panis ibi deerat,

Christus tamen aderat

Parando cibaria ;

15 Fame ne deficeret,

Adfuit, quae pasceret

Virum Dei, bestia.

16 Sic latere voluit,

Sed latentem repperit

Regalis familia.

17 Per nutricem cognitus

A rege commonitus

Struit monasteria ;

18 Illic castra militum

Pro Christo certantium

Collocavit fortia.

19 Hunc devote qui precatur,

Voto regis non frustratur

Protestante Gallia ;

20 Dum pro rege supplicatur,

Qui commisso premebatur,

Impetratur venia.

21 Mox nacturus praemia

Pro mundi victoria

Subiit caelestia;

22 Quem caeli militia

Duxit ad palatia,

Ubi pax et gloria.

23 Huius festum celebramus,

Venerantes habeamus

Semper in memoria ;

24 Hunc submisse flagitemus,

Flagitantes imploremus

Nobis dari gaudia,

25 Quo felices maneamus

Et cum sanctis gaudeamus

Cantantes Alleluia.