46. De sancta Afra et sociis.

1 Verbum sapientiae,
Regem regum gloriae
Laudent Sion filiae,

2 Manu qui potentiae
Vasa contumeliae
Vasa facit gratiae!

3 Oves solitudinis,
Deformes pastu criminis
A cultura Veneris
Suis reportat humeris;

4 Docet pudicitiam,
Informat ad iustitiam
Afram et Hilariam,
Affines et familiam.

5 Christe, tibi gloria!
In Augusta Rhaetia,
Urbe vere regia,

6 Cessat idolatria,
Floret theosebia,
Nova fiunt omnia.

7 Flos Narcissus germinat,
Verbum vitae seminat,
Fide mentes illuminat,
Mortis noctem terminat.

8 Regnum Dei patitur
Vim et vi diripitur,
Lux extincta revertitur,
Afrae cor accenditur.

9 Culpae quaerit veniam,
Spes inducit gratiam,
Se per paenitentiam
Deo libat hostiam.

10 Hoc exemplo rapitur
Mater et conteritur,
Tota domus sequitur,
Credit et convertitur.

11 Satan, furens bestia,
Clamat cum protervia
Tolli cum iniuria
Sua sibi spolia.

12 Praesul contra dimicat,
Armis hostem implicat,
Disputat sophistice,
Ludit syllogistice.

13 Confutatur et fugatur
Inimicus, relegatur ;

14 Quem occidat, draco datur:
Fontis usus liberatur.

15 Fervens in meridie
Sol calore gratiae

16 Discussa caligine
Corda replet lumine.

17 Consummatis omnibus,
Confirmatis ovibus
Virtutis probatio
Succedit, persecutio.

18 Afra comprehenditur,
Tribunali sistitur,
Poena flammae vindicis
Aptatur iussu iudicis.

19 Invicta non vincitur,
Tentatur, non flectitur,

20 Ad mortem arripitur
Flammis et incenditur.

21 Mater malis non turbatur,
Cum puellis immolatur,
Ardent carne, spiritu ;

22 Ardet corpus et purgatur,
Ardet et mens, ut fruatur
Deo carnis exitu.

23 Pro peccatis
ardet hostia ;
Cum puellis
mater, filia
Flagrant ad caelestia
Mente, fide socia.

24 In occursum,

Rachel, propera,
Consolare,

luctum tempera,
Exue cilicia,
Laetis muta tristia !

25 O ''Narcisse,
''fons eloquio,
Flos respirans
vitae praemio,
Princeps privilegio
Mortis et martyrio,

26 Sulcans corda
verbi vomere
Nos fecisti
Deo credere ;

Fac nos Deo vivere
Fide, verbis, opere.

27 Christe, pacis hostia,
Lux et lucis gloria,

28 Vitae vivens gratia,
Vis informans omnia,

29 Fac nos frui cum beatis
Tuae vultu maiestatis.

1 Verbum sapientiae,
Regem regum gloriae
Laudent Sion filiae,

2 Manu qui potentiae
Vasa contumcliae
Vasa fecit gratiae!

3. Afram et Hilariam,
Affines et familiam
Verbum sine semine
Suo fecundat germine;

4 Foedas in prostibulo,
Venales omni populo
A cultura Veneris
Suis reportat humeris.

5 Christe, tibi gloria !
Scortum, lupanaria
Tua mundas gratia.

6 Mortis haec mancipia
Levas a miseria,
Lavas vitae vitia ;

7 Ad infames feminas
Tu Narcissum destinas.
Regnum Dei vim patitur,
Hosti praeda tollitur.

8 Praeco Dei precibus
Orat, instat laudibus ;
Lux extincta revertitur,
Afrae cor accenditur.

9 Culpae quaerit veniam,
Spes inducit gratiam,
Se per paenitentiam
Deo libat hostiam ;

10 Aestuat medullitus
Orat et divinitus;
Sanctus enim Spiritus
Hanc accendit caelitus.

11 Altis daemon vocibus
Fremit et clamoribus
Intonat, sermonibus
Vexat et terroribus.

12 Praesul contra dimicat,
Armis hostem implicat,
Disputat sophistice,
Ludit syllogistice.

13 Confutatur et fugatur
Inimicus, relegatur ;

14 Quem occidat, draco datur,
Fontis usus liberatur.

15 Fervens in meridie
Sol calore gratiae

16 Mentis fugat tenebras
Pellit et illecebras.

17 Satan adversarius
Hostis et contrarius
Inflammatur odio,
Succedit persecutio:

18 Vanis Afram variis
Minis et iniuriis
Invitat ad vitia,
Cogit ad sacrificia.

19 Invicta non vincitur,
Tentatur, non flectitur,

20 Ad mortem arripitur
Flammis et incenditur.