54. De sancta Agnete.

1 Agnus Dei collaudetur,

Orbis totus collaetetur,

Ut festive celebretur

Agnetis martyrium ;

2 Castitas congratuletur,

Mens, manus, vox incitetur,

Omnis aetas veneretur

Virginis praeconium.

3 Haec est Agnes agna Dei,

Vas fidei, scala spei,

Canticum huius diei

Et laudis materia.

4 Habes hoc, quod imiteris,

Nec minus, quod admireris.

Sed si rationem quaeris,

Fit ex Christi gratia.

5 Ab annis infantiae

Studet innocentiae

Castrum pudicitiae

Servans illibatum;

6 Ipsi stans in acie

Pugnat verbis gratiae,

Tyrannum potentiae

Spernens dominatum.

7 Ab incesto

casta concupiscitur ;

Spretus in lucem

impugnans moritur ;

Orat, vita redditur,

8 Lupanari

denudata traditur,

Fuso crine

corpus omne tegitur,

Luce circumfunditur.

9 Forma, robur, sexus, aetas

Ad certandum reddit laetas

Mentes intuentium ;

10 Cum naturae vincunt meta8,

Constantes servant athletas

Ad mortis supplicium.

11 Salve, virgo, martyr alma,

Quae iam cum victrice palma

Transis ad caelestia.

12 Agnes, agnum imitaris

Et ab agno coronaris,

Sponsa es et filia.

13 Audi preces, vide vota,

Quae tibi mente devota

Plebs offert fidelium,

14 Et post huius vitae statum

Duc nos tecum ad optatum

Sanctorum consortium.