76. De sancto Augustino.

1 Augustine, pater cleri,
Legis schola, doctor veri,
Confessorum gloria,

2 Mente tibi grex devota
Promat, pastor, pia vota
Canens cum laetitia.

3 Nullus doctor par est tibi,
De quo tanta queant scribi
Merito praeconia.

4 Dignas laudes ergo, pater,
Digno plausu tibi mater
Iubilat ecclesia.

5 Te conversum prece matris
Lux divina dat ex atris
Resilire tenebris.

6 Tu per dogma, libros, actus

Mundi quasi fax es factus

Clara, nitens, celebris.

7 Per te, pietatis norma,
Tegit nos sub certa forma
Data clero regula.

8 Praesul eras Hipponensis.
Tumulat te Papiensis
Humi sacra cellula.

9 Pastor, oves nos curato,
Nos ad caulas stimulato
Pigros et serotinos.

10 Ne nos hostis claudat sera,
Pace mentis, quamvis sera,
Conformato tibi nos.