83. De sancta Barbara.

1 Angelorum militia
Sanctorumque consortia,
Tota caelestis curia
Una cum ecclesia

2 Trinitati individuae,
Unitati perpetuae
Decantent cum frequentia
Laudes et praeconia.

3 Cuius fonte saturata
Barbara se ei grata
Obtulit immaculata
Vivum sacrificium,

4 Dum parentes et gaudia
Mundi sprevit labentia
Et mente voluntaria
Subiit martyrium.

5 Ave, virgo sublimata,
Laeta caelo coronata,
Videns Christum aeternata
Castitatis gloria.

6 Supplicamus, o beata,
Laude Christi immorata,
Posce nobis ad beata
Pervenire gaudia.