92. De sancto Bernardo Claraevallensi.

1 Ad superna suspirantes
In aeterna luce stantes
Invocemus iubilo,

2 Ubi Pliades micantes
Igne lucent, exsultantes
In fluente rutilo;

3 Voluntatis unitate
Iuncti distant claritate,
Qui pares in gaudio;

4. In aeterni firmitate
Firmamenti fixi late
Diffunduntur radio.

5 Gyrum dissipans Arcturi
Dator boni veri puri
Bernardum eximium

6 Consummato transituri
Status cursu permansuri
Vocat ad tripudium.

7 Verus hic Israelita
Verus et Aaronita
Pro virtute varia

8 Concors corde, verbo, vita
Veste fulget redimita
Gemma multifaria:

9 Hunc Sardius dat cernuum,
Topazius pacificum,

Smaragdus castum praedicat,

10 Carbunculus igniferum,
Saphyrus pandit sobrium
Iaspis fidelem indicat.

11 Ligurius largifluum,

Achates prodit placidum,
Pudicum Ametistus,

12 Chrysolitus morigeram,
Onichinus dulcifluum
Constantem et Berillus.

13 His auro clausis gemmulis,
Patrum sculptis vocabulis
Ingrediens in templum

14 Invitat tintinabulis,
Ut caritatis vinculis
Trahamur ad exemplum,.

15 O Bernharde, forma morum,
Lapidum in ignitorum
Iam locatus medio,

16 Insta patri, qui cunctorum

Curam gerit, ut suorum

Locemur in praedio.