93. De sancto Bernardo Claraevallensi.

1 Bone doctor
Et salutis viae ductor,
O Bernarde!

2 Fac gustare
Caelestia et amare,
O Bernarde.

3 Fontem veri luminis
Tuis monstra famulis,
O Bernarde.

4 Mentes nostras erige
Ad solem iustitiae,
O Bernarde.

5 Gaude, pater inclite,
Qui cubas in meridie,
O Bernarde,

6 Sponso iunctus firmiter
Et inseparabiliter,
O Bernarde.

7 Caeli gaudet curia
De tua praesentia,
O Bernarde,

8 Chorusque angelicus
Circumdat te splendidus,
O Bernarde.

9 Ministrantem Filium,
Propinantem Spiritum
Cernis, Patrem luminum,
O Bernarde ;

10 Quod non vidit oculus,
Quod non fatur homulus,
Tuus gustat spiritus,
O Bernarde.

11 Amoris pelago
Absorptus maximo
Pausas perpetuo,
O Bernarde.

12 Iam dicit spiritus,
Ut a laboribus
Quiescas amplius,
O Bernarde.