QUAESTIO XVIII.

Utrum stella comata sit vapor terrenus ?

Arguitur quod non, quia vel motus ejus esset naturalis, vel violentus; non violentus, quia talis motus competit cuilibet ejusdem speciei cum stella comata. Similiter est uniformis, et quandoque velocior in fine, quod non posset esse nisi esset naturalis: non naturalis,

quia nullum grave naturaliter movetur motu circulari; modo stella comata est naturaliter gravis, cum sit vapor terrenus. Similiter stella comata apparet moveri ad diversas differentias positionis; modo nullum inanimatum potest ita moveri naturaliter,

Secundo, si sic, maxime tunc fieret in superiori regione aeris; modo consequens est falsum, quia materia ista transeundo per mediam regionem, vel propelleretur a frigiditate, vel congelaretur. Si sic, dato quod transiret mediam regionem, tunc dissolveretur a superiori regione, propter caliditatem. Et patet consequentia per Aristotelem in littera.

Tertio, quia materia, ex qua generaretur, esset vel multa, vel pauca: non pauca, quia tunc statim consumeretur a caliditate continentis; nec multa, quia tunc totum intra modicum tempus incenderetur, sicut videmus hic inferius, quod multa combustibilia apposita igni comburerentur intramodicum tempus.

Oppositum arguitur per Aristotelem in isto primo.

In ista quaestione primo videbitur de modo generationis cometae. Secundo, de motu ejus.