QUAESTIO II.

An impressiones Meteoricae fiant per naturam inordinatiorem ea natura, quae est propria elementorum?

Arguitur quod non, quia impressiones tales non fiunt secundum: naturam; ergo, etc. Consequentia nota est, et antecedens patet, quia illa non fiunt secundum naturam, quorum generationibus necessario concomitantur motus violenti; sed sic est de istis impressionibus, nam in ictu fulminis descendit ignis, in generatione nubium, et ventorum ascendit exhalatio terrena; sed descensus ignis, et ascensus terrae sunt motus violenti: ergo, etc.

Secundo, nam istae impressiones meteoricae fiunt a casu: ergo non fiunt a matura. Consequentia tenet, quia ista, quae fiunt a casu, fiunt praeter intentum agentis: sed agens intendit ea, quae fiunt a natura, ut vult Philosophus 2. Physicorum; rgo, etc. Antecedens patet, nam istae impressiones eveniunt extra non semper, et frequenter, et per consequens a casu.

Tertio, impressiones meteoricae non fiunt inordinate, ergo non secundum naturam inordinatiorem. Consequentia nota est, et antecedens apparet per Philosophum in

fine 12. Met. ubi dicit quod entia nolunt male disponi.

Quarto, si impressiones meteoricae fierent inordinate, sequitur quod Astrologia de judiciis, saltem ad illam partem, quae est de impressionibus aeris, esset falsa, et incerta. Consequens falsum, et probatur quia in Astrologia de judiciis ponuntur certae regulae de adventu hujusmodi impressionum: modo, si fiant inordinate, de adventu illarum non possit poni certa regula. Unde Astrologi de eventu pluviae ponunt talem regulam quod si in hora conjunctionis Solis et Lunae, aer ascendens super aliquam regionem pluviosus fuerit, cum Luna fuerit ad gradum ascendentem, pluet in illa regione.

Quinto, quia ordo in causa ponit ordinem in effectu, sed causae istarum impressionum sunt ordinatae: ergo et impressiones fiunt ordinatae. Major apparet, quia aliunde non potest argui ordo effectus. Et minor apparet per Philosophum in prooemio, ubi dicit quod motus corporum caelestium sunt causae illarum impressionum, qui motus sunt ordinati.

Sexto, quia in natura nihil est inordinatum; sed istae impressiones sunt a natura: ergo non sunt inordinatae. Major apparet, quia haec natura in omnibus est causa ordinis: et minor patet, quia istae impressiones fiunt a causa naturaliter agente propter determinatum finem.

Oppositum arguitur per Aristo telem in primo capite hujus. In ista quaestione, primo videbitur si impressiones meteoricae fiunt secundum naturam.

Secundo, videbitur in generali de ordine universi, et in quibus ordo consistit.

Tertio, videbitur specialiter de ordine istarum impressionum.