ARTICULUS I. De causis refractionis visus.

De primo, dico quod Philosophus in proposito capit visum pro radio visuali, et non est differentia in proposito, utrum radius iste veniat ab objecto, vel ab ipso visu, quia quocumque modo fiunt, imaginandi sunt consimiles radii, et anguli consimiles, ideo quoad propositum non fiet difficultas, utrum visus fiat intus suscipiendo, aut extra mittendo.

Secundo sciendum, propter istum terminum refrangere, primo quod linea incidentiae dicitur linea, secundum quam forma directe diffunditur per medium unius diaphani, sicut si a luminoso B ad punctum A diffundatur forma, quae est lumen, tunc linea A B dicitur linea incidentiae; sed refractio dicitur incurvatio lineae ad angulum, sicut, verbi gratia, si linea A B incurvetur ad visum C, et tunc totalis incurvatio B ad C vocatur refractio. Sed punctus refractionis est punctus medii diaphani, a quo linea incidentiae incurvatur ad visum, sicut est punctus A. Sed linea refracta dicitur linea a puncto refractionis usque ad visum directe extensa, sicut est linea A C. Sed angulus incidentiae dicitur minor angulus, quem continet linea incidentiae cum linea perpendiculari educta a puncto refractionis super superficiem duo media dividentem,

vel etiam cum ipsa superficie, verbi gratia, sit perpendicularis ducta a puncto A super superficiem D E, quae perpendicularis sit F G, dico quod angulus A B F, est angulus incidentiae, vel etiam angulus B A D; sed angulus refractionis dicitur minor angulus,

AdminBookmark

quem tenet C linea refracta cum eadem perpendiculari, vel angulus C A E. Sed linea refractionis dicitur linea, secundum quam forma revertitur in eamdem partem, a qua venit, propter soliditatem superficiei, aut speculi, quam transire non potest, ut si linea A B sit superficies speculi, tunc linea C D, dicetur linea incidentiae, sed D, E, dicetur linea refractionis.

AdminBookmark

Item sciendum, quod linearum incidentiae, sive directi incessus, quaedam incidunt perpendiculariter, quaedam oblique. Linea perpendiculariter incidens super aliquam superficiem, dicitur illa, quae super illam superficiem causat utrobique angulos rectos. Sed linea illa dicitur oblique incidere, quae incidit super aliquam superficiem ad angulos impares, et inaequales.

Et ex istis patet quod quaedam est visio facta per lineam rectam, sicut quando visibile directe opponitur visui, sine diversitate mediorum in densitate, et raritate. Alia est visio per lineas refractas, sicut quando inter visum et visibile sunt media diversarum diaphaneitatum: tunc enim radii, vel species venientes ab objecto non incidunt directe ad visum, sed curve faciendo angulum. Alia est visio facta per lineas reflexas, sicut per specula.

Istae igitur definitiones sunt praemissae, ut termini sint noti, si postea utamur in assignatione causarum. Et hoc de primo.