QUAESTIO XXV.

Utrum fontes et fluvii generentur ex aqua pluviali, congregata in visceribus terrae?

Arguitur quod sic. Primo, quia videmus quod quidam fontes durant per annum, et alii non: modo hoc non esset, nisi quia illi plus durantes venirent ex majori concavitate.

Secundo, quia videmus quod patriae, in quibus modice pluit, habent fontes, quod non esset, nisi fontes haberent ortum, vel principium ex aqua pluviali.

Tertio, quia fontes augmentantur in tempore pluvioso, et diminuuntur in tempore sicco, quod non esset, nisi haberent principium ex aqua pluviali.

Quarto, in terraemotu apparent quidam fontes, qui prius non apparuerunt, et hoc non est, nisi quia aperta est concavitas, in qua aqua concludebatur.

Quinto, quia aliter non videretur quo deveniret aqua pluvialis.

Sexto, quia sub terra invenitur aqua, vel igitur illa praeexistebat ex aqua pluviali, et habetur propositum; vel generatur ex novo, et tunc vel a calido, et hoc non, quia calidi potius est consumere aquam, quam generare; vel a frigido, et hoc non, quia tunc tota terra deberet converti in aquam.

Septimo, si de novo generatur infra terram, vel ascenderet ad orificia fontis naturaliter, vel violenter; non naturaliter, quia cum aqua sit gravis, non movetur naturaliter sursum; nec violenter, quia sicut aqua naturaliter descendit de aere, ita videtur quod naturaliter ascendit a terra, tanquam de loco sibi naturali.

Oppositum arguitur per Aristotelem in isto primo.

In ista quaestione primo videbitur de loco, de quo veniunt fontes. Secundo videbitur si fontes flant ex aqua pluviali. Tertio videbitur de modo generationis fontium.