ARTICULUS IV.

De causa finali ventorum.

De causa finali, dicitur quod ventus est principaliter et primo propter congregare nubes. Et ideo dicit Aristoteles quod Caecias attrahit nubem sicut avarus pecuniam. Secundo, movetur ventus propter deferre nubes de una regione in aliam, propter irrigationem terrae, ita quod per conversionem nubis in aquam diversae partes terrae irrigentur propter motum nubis a vento. Tertio, potest dici quod est propter salutem arborum, quia sicut homo et alia animalia praeter nutrimentum indigent quodammodo exercitio, ut melius conserventur in sanitate, ita consimiliter motus arborum, est eis per ventum exercitium.

Patet igitur ex istis, quae sit materia venti, quae forma: unde est principium motus ipsius, et propter quem finem fiat.

Ad rationes: ad primam, conceditur quod tempore ventoso esset major calor, nisi aliunde esset impeditum, scilicet, quia ventus ille deferret secum aerem recentem, vel quia transiret super nives, et glacies, unde infrigidaretur: ideo ad ventum recentis aeris ponimus calida, ut frigefiant a vento.

Ad secundam: aliquis ventus est fri gidus, etc. Negatur antecedens, quantum est ex parte sui, et hoc propter frigiditatem loci, per quem transeunt.

Eodem modo respondetur ad aliam de humiditate.

Ad aliam: tunc tempore sereno, etc. Concedo consequentiam, et consequens, nisi impediret consumptio exhalationis a calore Solis.

Ad aliam: tunc ventus ascenderet: concedo quod ventus ascenderet sursum, nisi propelleretur a frigiditate.

Ad aliam: ventus est aer motus; ne gatur. Ad probationem dico quod non est simile, quia ignis movetur per naturam, et aqua movetur quodammodo violenter per influentiam Lunae; modo neutra istarum causarum concurrit in aere. . Ad aliam: aliquis ventus, etc. negatur. Ad probationem de follibus, dico quod talis aer artificialiter motus non est ventus, nec est simile de hujusmodi aere moto, et de vento, quia non possent imaginari talia artificia, quibus aer moveretur ad modum venti. Et sic finimus.