2. De sanctissima Trinitate.

Ad Matutinum,

1. Quicunque vult animam

firmiter salvare,
Tres personas credere,

ipsas honorare
Tenetur et iugiter

precibus orare,
Unum Deum dicere,

solum adorare.

Ad Primam.

2. Trinitatem credimus:

summum genitorem,
Sanctum eius filium,

nostrum redemptorem,
Spiritum paraclitum,

gratiae datorem;
Unum tamen dicimus

Deum creatorem.

Ad Tertiam.

3. A se patrem credimus,

cum hunc generavit
Filium, de lumine

lumen resultavit,
Procedentem spiritum

uterque spiravit,
Nullus horum genuit

ipsum vel creavit.

Ad Sextam.

4. Vox ad patrem pertinet,

super baptizatum
Quae sonavit filium

humanae vocatum
Naturae susceptio,

columbae volatum
Credimus et speciem

paraclito datum.

Ad Nonam.

5. In patre potentia,

cuncta denotatur,
Filio prudentia

omnis declaratur,
Gratia paraclito

universa datur,
Qui cum patre natoque

conglorificatur.

Ad Vesperas.

6. Voluntate filius

patris incarnatus
Est de spiritu sancto,

de virgine natus,
Crucifixus, mortuus

atque tumulatus,
Resurgens discipulis

caelis sublimatus.

Ad Completorium.

7. Et per ipsum erimus

omnes iudicati,
Beati ad gloriam

aeternam vocati,
Ad poenas perpetuas

mali condemnati,
Haec omnia credere

tenentur beati.

Conclusio.

8. Has horas sic recolo,

ut in trinitate
Veneretur unitas,

et in unitate
Honoretur trinitas,

atque pietate
Faciat me credere

hoc cum firmitate.