122. Super Ave Maria.

1. Ave, quae per angelum

ave suscepisti,
Cuius verbis credula

statim concepisti
Redemptorem omnium,

nec sic amisisti
Virginales flosculos,

quibus micuisti.

2. Iure tibi convenit

hoc nomen Maria,
Quod interpretatum est

stella maris pia,
Esto navigantibus

taetrum mare via,
Quod cum pertransierint,

fruantur Messia.

3. Summa fulges gratia,

tota gratiosa,
Paradisi viola,

caeli vernans rosa,
Vernans supra sidera,

gemma pretiosa,
Quae nos premunt, remove,

quaeque vitiosa.

4. Plena sancto pneumate,

cuius celsis donis
Celsior effecta es

Cherubim et Thronis,
Rogamus, dulcissima,

mentibus te pronis,
Nos purgatos vitiis

colloces cum bonis.

5. Dominus, qui condidit

caelum, terram, mare,
Cuius nutrix fueras,

se vult inclinare
Tuis sanctis precibus

et, quod petis, dare,
Domina, pro servulis

igitur precare.

6. Tecum sine termino

tuus est amator,
Tuus natus genitor

tuus et plasmator,
Tua prece nostri sit

criminis purgator,
Quem venturum concinit

quondam legislator.

7. Benedicta virgula,

quae produxit florem,
Quem fructus subsequitur,

qui nescit mareorem,
Per hunc purga, domina,

sordium foetorem,
Qui inexstinguibilem

minatur ardorem.

8. Tu, quae magis coruscas

quam fulgor solaris,
Quae in summis, mediis,

imis dominaris.
Salva nos a fluctibus

huius mundi maris
Et duc ad. palatium,

ubi gloriaris.

9. In te ancoravimus

fluctibus gravati
Procellarum acrium

crebro nostrae rati
Ruinam minantibus,

non sumus quassati,
Qui redempti sanguine

sumus tui nati.

10. Tu in mulieribus

obtines primatum,
Quae secundum veterem

pariunt reatum,
Cuius rei nescia

peperisti natum,
Qui nostrum celeriter

melioret statum.

11. Et ut haec maturius

per te consequamur,
Repelle, quod impedit,

ne exaudiamur,
Ut solutis nexibus,

quibus implicamur,
Ad perenne gaudium

te duce ducamur.

12. Benedictus parvulus,

quem mammae paverunt,
Quae caelestis gratiae

rore stillaverunt
Huic enim serviunt,

favent et faverunt
Omnia, quaecunque sunt,

fuerant et erunt.

13. Fructus quondam vetitus

vita nos privavit,
Quam fructus virgineus

nobis restauravit,
Et qui caelos condidit,

angelos creavit,
Thalamum virgineum

humilis intravit.

14. Ventris sacrae virginis

clausa sunt secreta,
Caelestis consilii

gestantes decreta,
Et in suo gremio

clausum tenet laeta,
Caeli, terrae, marium

quae non claudit meta.

15. Tui demum servuli,

virgo, te laudamus
Atque tuum filium

supplices rogamus,
Ut in huius stadio

vitae sic curramus,
Ut post cursum bravium

regni capiamus.

16. Amen dicant singuli

fide concurrentes,
Passuum non motibus

et bene credentes,
Et sic cursum finiant

non deficientes,
Ut cum Christo maneant

iugiter gaudentes.