156. Super Ave Maria.

1. Tu quondam per angelum

sumens magnum Ave,
Modo per vernaculum

sume parvum Ave,
Tu dilecto filio

funde tuum Ave,
Ut cum vultu placido

sumat meum Ave.

2. O de Deo geniti

genetrix, Maria,
O coetus angelici

gaudium, Maria,
O regina virginum,

domina Maria,
O curatrix omnium,

medica Maria.

3. Te divina gratia

mire procuravit,
Te virtutum gratia

privilegiavit,
Ventrem tuum gratia

prole fecundavit,
Cuius mera gratia

damnatos salvavit.

4. O plena munditia,

cella puritatis,
O plena laetitia,

porta pietatis,
O plena divitiis,

portus ubertatis,
O plena deliciis,

hortus voluptatis.

5. Te solam prae ceteris

Dominus dilexit,
Ultra summos angelos

Dominus te vexit,
Te decoris pallio

Dominus contexit,
Te dulcoris oculo

Dominus respexit,

6. Nam in ventris alveo

Requievit tecum,
Iacens in praesaepio

Colludebat t e c u m ;
Qui prius in stadio

Laborabat tecum,
Nunc sedens in solio

Gratulatur tecum.

7. Benedicto nomine

gaudes benedicta,
Nam Maria nomine

tu es benedicta,
Lumen Dei resonat

haec vox benedicta,
Deum tuo nomine

claudis benedicta.

8. Tu es arca continens

manna beatorum,
Tu es virga dirigens

gressus viatorum,
Tu es urna aurea

claritate morum,
Tu geris in tabulis

verba preceptorum.

9. In te nova gratia

novo modo spirat,
Et in tua gratia

peccator respirat,
In tuis deliciis

devotus suspirat,
Et in tuis meritis

ad regnum aspirat.

10. Tu in mulieribus

non habes reatum,
Tu in mulieribus

tenes caelibatum,
Tu in mulieribus

paris Deum natum,
Tu in mulieribus

geris principatum.

11. Tu primam et ultimam

naturam unisti,
Tu Deum et hominem

ventre conclusisti,
Angelos et homines

concordes fecisti,
Gratiam et gloriam

nobis invenisti.

12. Benedictus uterus,

de quo processisti,
Benedictus Dominus,

cui placuisti,
Benedictus spiritus,

de quo concepisti,
Benedictus filius,

quem tu genuisti.

13. Fructus tuus sanior

omni nutrimento,
Fructus tuus dulcior

omni blandimento,
Fructus tuus pulchrior

omni ornamento,
Fructus tuus clarior

auro et argento.

14. Ventris tui lectulus

tactum viri nescit,
Ventris tui thalamus

liliis albescit,
Ventris tui hortulus

gratia flammescit,
Ventris tui flosculus

sapore dulcescit.

15. Tui fructus gratia

fac nos impetrare,
Tui fructus gloriam

da desiderare,
Tui fructus gaudium

fac nos degustare,
Tui fructus praemia

da participare.

16. Sit laus patri Domino,

omnis dicat Amen,
Sit laus suo filio,

omnis dicat Amen,
Sit laus sancto flamini,

omnis dicat Amen,
Sit laus matri virgini,

Omnis dicat Amen.