90. Super Ave Maria.

1. Ave fuit prima salus,
Qua vincitur hostis malus,
Remordet culpa noxia
Quia nos. Ave Maria.

2. Maria, dum salutaris,
Ab angelo sic vocaris,
Nomen tuum daemonia
Repellit. Ave Maria.

3. Gratia sancti spiritus
Fecundavit te penitus,
Gratiarum nunc praemia
Da nobis. Ave Maria.

4. Plena tu es virtutibus
Prae cunctis caeli civibus,
Virtutes et auxilia
Praesta nunc. Ave Maria

5. Dominus ab initio
Destinavit te filio,
Tu es mater et filia
Praefelix. Ave Maria.

6. Tecum lactantur angeli
Et exsultant archangeli,
Caeli caelorum curia,
O dulcis ave Maria.

7. Benedicta semper eris
In terris et in superis,
Tibi nullus in gloria
Compar est. Ave Maria.

8. Tu cum Deo coronaris
Et veniam servis paris,
Fac, nobis detur venia
Precibus. Ave Maria.

9. In gentes movent proelium

Caro, mundus, daemonium,

Sed defende nos, o pia,

O clemens. Ave Maria.

10. Mulieribus omnibus
Replens summis opibus,
Reple nos tua gratia
Egentes. Ave Maria.

11. Et post partum velut prius
Virgo manens te filius
Descendit velut pluvia
In vellus. Ave Maria.

12. Benedictus sit filius
Adiutor et propitius,
Adiutrix et propitia
Sis nobis. Ave Maria.

13. Fructus tuus tam amavit,
Quod in te nos desponsavit,
Ut parentum opprobria
Deleres. Ave Maria.

14. Ventris claustrum baiulavit
Iesum, qui nos sorde lavit,
Nunc exores voce pia
Pro nobis. Ave Maria.

15. Tui viroris speculum
Clarificat hoc saeculum,
Vitiorum flagitia
Purga nos. Ave Maria.

16. Iesus, salvator, filius,
Perducat nos superius,
Ubi regnas in gloria
Meritis. Ave Maria.

17. Amen est finis salutis
Aperiens vocem mutis,
Aperi nobis, Maria,
Caeli portas ad gaudia.