118. Super Ave Maria.

1. Ave, plena gratia

beata Maria,
Ave, Dei genetrix,

ave, virgo pia,
Ave, rosa, lilium,

paradisi via,
De te sine semine

processit sophia.
2. Dominantis domina,

Dominus est tecum,
Piarum piissima,

et tu manes secum,
Sanctarum sanctissima,

rogo te, sis mecum,
Me miserum famulum

fac adesse tecum.
3. Tu in mulieribus

vere benedicta,
Nam per te sunt remissa

omnia delicta,
Vera via Domini

erat derelicta,
Sed per te directa est,

porta caeli, vita.

4. Atque benedictus est

fructus ventris tui,
Laus, honor et gloria

semper assunt cui,
Qui salvavit saeculum

passione sui,
Me salvari facias,

qui peccando rui
5. Ista salutatio

tibi est portata
Gabriele angelo

et annuntiata,
Voluntate Domini

sic es salutata,
Sis mea custodia,

virgo coronata.
6. Tu es virgo virginum,

virgo salutaris,
Domina tu gentium

atque stella maris,
Omnibus virginibus

sola dominaris,
Tu salus fidelium,

virgo singularis.

7. O felix puerpera,

caelorum regina,
O virgo pulcherrima,

stella matutina,
Pauperum refugium,

spes et medicina,
Tu flos florum omnium,

rosa sine spina.
8. Sedes super Cherubim,

virgo gloriosa,
Iuxta tuum filium,

pulchra velut rosa,
Redolens aromata,

nardus pretiosa,
Plus quam solis radiis

fulges speciosa.
9. O mea spes unica,

clara lux diei,
Per quam mundus salvus est,

et salvantur rei,
Succurre velociter,

miserere mei,
Me salvari facias

in conspectu Dei.

10. Adiuva celeriter,

mater pietatis,
Quae portasti filium

summae bonitatis,
Munda me a sordibus

culpis et peccatibus,
Omnibus a vitiis

atque sceleratis.

11. Sum peccatis omnibus

miser involutus,
Intus et exterius

fortiter indutus,
Velut porcus undique

foret revolutus,
Pessimis operibus

undique pollutus.

12. Innumerabilia

mea sunt peccata,
Turpida et foetida

sicut menstruata,
Ergo tibi supplico,

felix advocata,
Ut mihi sint omnia

per te relaxata.
13. Ab omni me scelere

semper tu defende,
Ne me possit laedere,

super me extende
Pietatis dexteram

mihique protende,
Ut ad tuam gloriam

ducas me colende.
14. O virgo pulcherrima,

me tibi commendo,
Patri atque filio

gratias agendo
Sanctoque spiritui

culpas confitendo,
De peccatis omnibus

veniam petendo.