14. Horae de Passione Domini.
Ad Matutinum.

1. Patris sapientia,

Christus, in agone
Nocte fudit sanguinem

in oratione,
Mox hunc Iudas tradidit

deosculatione,
Se offert turbis Dominus

occurrens illis prone.

2. Capitur et stringitur

a suis derelictus,
In domo Annae spernitur

per alapam adflictus,
Negat hunc discipulus

timore mortis victus,
Ducitur ad Caipham

Iesus dire strictus.

3. Falsos testes patitur

blasphemus iudicatur,
Heus mortis dicitur

et colaphis mactatur,
Hinc velatus facie

sputis maculatur
Et a percussoribus

prophetare clamatur.

Ad Primam.

4. Hora prima Dominus
Pilato praesentatur,
Falsis testimoniis
a multis accusatur,

Herodi missus spernitur,
veste subsannatur,

Hinc Pilato redditur,
ut morte puniatur.

Ad Tertiam.

5. Crudele concambium,

hora tertiarum
Latro solvi petitur,

necari rex terrarum,
Crucifigi clamitant

gentes tenebrarum,
Vestibus exuitur

vestitor animarum.

6. Ad columnam ducitur,

vinculis ligatur,
Flagris atque virgulis

dire laceratur,
Purpura induitur,

spinis coronatur,
Percutitur arundine,

false salutatur.

7. Caeditur, conspuitur

vultus eius laetus,
Atque multicipliter

a gentibus sic spretus,
Exit de praetorio

opprobriis repletus,
Crucifige repetit

Iudaeorum coetus.

Ad Sextam.

8. Hora sexta Dominum

sententia damnavit,
Crucem suam propriam

Calvariam portavit,
Ipsum turba militum

vestibus nudavit,
Adfigens in patibulo

clavis perforavit.

9. Ut propheta cecinit,

vestes dividuntur,
Titulus inscribitur,

ludibria dicuntur,
Matris cor et filii

simul patiuntur,
Virgo cum discipulo

pariter iunguntur.

Ad Nonam.

10. Hora nona Dominus

relinqui se clamavit,
Salutem nostram sitiens
acetum, fel potavit,

Dicens "consummatum est"

spiritum efflavit,
Tunc eius latus lancea
miles perforavit.

Ad Vesperas.

11. De cruce deponitur
hora vespertina,
Ungitur aromate
vitae medicina,

Volvitur in sindone,
latet vis divina,

Sic corona gloriae
iacuit supina.

Ad Completorium.

12. Hora completorii
Iesus tumulatur,
Petra grandi clauditur
amare lamentatur,

Infernus perdit spolia,
caelum reseratur,

Sic salus olim perdita
per Iesum reparatur.