87. Super Ave Maria.

1. Ave, Dei genetrix,

pia consolatrix,
Desolatum refove,

gemma confortatrix,
Deviatum revia,

stella gubernatrix,
Cor meum laetifica,

gaudii donatrix.

2. Maria , te invoco,

ut me consoleris,
In hoc mundo fluctuo,

pro peccatis pleris,
Nisi mei miseris

cito recorderis,
Ut lucifer corruam

in tenebris feris.

3. Gratia novae legis

per te inchoavit,
Dum virtus altissimi

in te obumbravit,
Ipsa me consoletur,

quae Deum portavit,
Spoliavit inferos

et caelos ditavit.

4. Plena es et redundans

cunctis virtutibus,
Sicut porcus dormio

in meis faecibus,
Excita me, domina,

a somnis talibus,
Ut vacare valeam

in tuis laudibus.
5. Dominus a me fugit

ob mea peccata,
Sed tu ipsum revoca,

mea advocata,
Alleva gravamina

per malos illata,
Et tua intercessio

erit mihi grata.
6. Tecum non habebitur

aliqua quaestio,
Ubi allegabitur

filii passio

Et dirae passionis
matris compassio,

Tunc tempore cessabit
omnis obiectio.

7. Benedicta benedic

mihi peccatori,
Parce, mea domina,

mihi transgressori,
Actus meos dirige

meo creatori,
Ut ad ipsum redeam,

quando vadam mori.

8. Tu in necessariis

esto refugium,
In meis angustiis

firmum praesidium,
In meis tristitiis

merum solacium,
In meis miseriis

verum subsidium.

9. In mea morte meam

animam respice
Et de manu daemonum

potenter eripe,
Et sancto Michaeli

instanter praecipe,
Ut ipsam collocet

cum suo principe.

10. Mulieribus cunctis

atque hominibus,
Tam vivis quam defunctis

meis parentibus
Tribue solacium

de caeli sedibus,
Ut regnare valeant

cum sanctis omnibus.
11. Et cunctis christianis

idem solacium
Praebe, Dei genetrix,

ob Christi praemium,
Omnes te invocamus

in adiutorium,
Ut per te habeamus

aeternum gaudium.

12. Benedictus Dominus

semper timebitur,
Dum tuba resonabit,

mundus tremebitur,
Quid faciam, quando vix

iustus [salvabitur] ?
Ex nunc ad te fugio,

ad quam refugitur.
13. Fructus tuus, domina,

fructus est caelicus,
De quo semper fruitur

chorus angelicus,
Ipsum mihi praebcat

supernus medicus,
Ut in fine mihi sit

cibus salvificus.

14. Ventris tui thalamus
est habitaculum,
In quo Dei filius
sumpsit corpusculum,

In quo pax iustitiae
contulit osculum,

Ipsum mihi praebcat,
qui fecit sacculum.

15. Tui nati vulnera

fluxerunt sanguine,
De quo Dei filius

redemit hominem,
Ipse a me auferat

omnem rubiginem,
Ut videre valeam

eius imaginem.
16. Amen cantet dulciter

chorus angelorum,
Cum communi iubilo

omnium sanctorum,
Huic Mariae supplici

et Deo deorum,
Ut in fine nobis dent

gaudia caelorum.