42. De Compassione BMV.

Ad Matutinum.

1. Mater sapientiae,

rosa sine spina,
Maria ingemuit

hora matutina,
Dum audivit Dominum

captum et ligatum,
Pergit Ierosolymam,

ut videret natum.

Ad Primam.

2. Hora prima filium

caesum et afflictum
Cernit et ab impiis

vinculis astrictum,
Ad Pilatum praesidem

duci cum clamore
Fili mi, ingeminans

magno cum angore.

Ad Tertiam.

3. Adclamantem populum

hora tertiarum
Crucifige percipit,

cor fit plus amarum,
Spinis punctum aspicit

natum et ferentem
Crucem, sequens filium

maestam habet mentem.

Ad Sextam.

4. Hora sexta Dominum

in crucem levari
Perspicit et ferreis

clavis conclavari,
Frangi membra geniti

sanguinemque fundi,
Mente fit exanimis

dominatrix mundi.

Ad Nonam.

5. Hora nona spiritum

patri commendantem
Audit natum, valida

voce exspirantem,
Cuius latus lancea

quando perforavit,
Genetricis viscera

ferrum penetravit.

Ad Vesperas.
6. De cruce depositum
hora vespertina
Tenet inter brachia
caelorum regina,
Quae dum lavit lacrimis

madidum cruore,
Se aspergit sanguinis
sacrati rubore.

Ad Completorium.

7. Hora completorii,

quando sepulturae
Corpus sacrum traditur,

virgo mater dure
Lamentatur, eiulans

se tum desolatam
Natoque tam inclito

se fore privatam.

Conclusio.

8. Has horas canonicas

tibi cum amore,
Virgo mater, offero

tuo pro dolore,
Ut quae crucem filii

mente pertulisti,
Nos ducas ad gaudia

sempiterna Christi.