98. Super Ave Maria.

1. Ave, lux fidelium,

Rosa speciosa,
Mentis refrigerium,

Gemma pretiosa,
Reis dans remedium,

Vitis fructuosa.

2. Maria mirifica,
Pacis mediatrix,
Mira mundi medica,

Criminum mundatrix,
Spes lapsorum unica,
Pia consolatrix.

3. Gratia tu praedita
Pollens refulsisti,

Genitorem genita
Deum genuisti

Et nobis gratuita
Dona tribuisti.

4. Plena sacro numine
Concepisti pura
Sine viri semine,
Miratur natura,
Mystico spiramine
Christum paritura.

5. Dominus ingenitus
Pater te elegit,
Dominus te genitus

Matrem praeelegit,
Dominus paraclitus
Obumbrans te legit.

6. Tecum tota trinitas

Manet deitatis,
Residet immensitas

Summae bonitatis,
Sumitur humanitas

Verbo veritatis.

7. Benedicta femina,
Regina caelorum,

Angelorum domina,
Salus miserorum,

Quae transcendis agmina
Cuncta beatorum.

8. Tu in mulieribus
Sola virgo parens,

Eminens virtutibus,
Omni labe carens,

Signis mirabilibus
Toti mundo parens.

9. Et nunc iam feliciter
Prae cunctis beata,
Amore perenniter
Vere suscitata,
Mente, carne pariter
Es glorificata.

10. Benedictus filius,

Qui ex te est natus,

Clemens et propitius
Cunctis demonstratus,

Per quem homo devius
Fuit restauratus.

11. Fructus vitae nobilis,
fructus ventris tui,

Quo viator fragilis,
Si vult, potest frui

Et in te fit stabilis
Atque compos sui.

12. Ventris tui thalamum
Rex regum ornavit,

Velut scribae calamum
Sibi praeparavit,

Qui ut fragrans balsamum
Aromatizavit.

13. Iesus, salus hominis,
Tua sancta prece

Mundat labe criminis
Et ab omni faece,

Quotquot tui nominis
Servi volunt esse.

14. Virgo viri nescia,

Virgo singularis,
Tota plena gratia,

Clara stella maris,
Nostra pelle vitia

Nosque tuearis.

15. Mater regis gloriae,
Flos humilitatis,
Lumen caeli curiae,
Norma sanctitatis,
Post cursum miseriae
Nos iunge beatis.

16. D ei habitaculum,

Exemplar virtutis,
Puritatis vasculum,

Verae fons salutis,
Tu solvisti vinculum
Nostrae servitutis.

17. Ora semper (ad) Dominum,

Advocata nostra,
Piis votis hominum

Piam te demonstra,
Purga sordes criminum

Et peccati monstra.

18. Pro nostris flagitiis,

Virgo, interpella,
Munda nos a vitiis,

Divinorum cella,
Ne mortis suppliciis

Iungat nos procella.
19. Nobis peccatoribus

Gratiam impende,
Pulsis pravis moribus

Virtutem impende,
Cunctis transgressoribus

Matrem te ostende.
20. Amen fac nos prosequi

Tu, quae meruisti
Deo digne obsequi

In hac valle tristi,
Et sic tandem consequi

Regnum Iesu Christi.