9. Officium Corporis Christi.

Ad Matutinum.

1, Veneremur consecratum
In altari Dei verbum,
Ut pascamur interius
Cibo suavissimo.

2. Iubilemus lingua, corde,
Accedamus pura mente
Manducemusque devote
Panem salutiferum.

8. Gloria tibi, Domine,
Sumpto sub panis specie,
Cum patre et sancto spiritu
In sempiterna saecula.

A d Primam.

1. Iam lucis orto sidere
Deum precemur supplices,
Ut nos simus participes
Tam salutaris hostiae.

2. O vere digna hostia,

Quae vitam nobis omnibus,
Qui te devote sumimus,
Hic praestas et in patria.

3. Gloria tibi, Domine,
Sumpto sub panis specie,
Cum patre et sancto spiritu
In sempiterna saecula.

Ad Tertiam.

1. O fragiles, accedite

Ad datum nobis ferculum,
O tristes, omnes bibite
Oblatum nobis poculum.

2. Accedens non conteritur,
Sed tali cibo pascitur,
Quo in aeternum vivitur,
Si tamen digne sumitur.

3. Gloria tibi, Domine,
Sumpto sub panis specie,
Cum patre et sancto spiritu
In sempiterna saecula.

Ad Sextam.

1. Nobis cibus salvificas,
Panis datur angelicus,
Manducat pauper et servus
Id, quod manducat angelus.

2. Mirabilis dilectio

Monstratur hic a Domino,
O qualis manducatio
Nunc facta est a saeculo.

3. Gloria tibi, Domine,
Sumpto sub panis specie
Cum patre et sancto spiritu
In sempiterna saecula.

Ad Nonam.

1. Candente sole gratiae
Se Christus verus lucifer
Infundat nostris mentibus,
Illustret quas interius.

2. Ut digne suum sanguinem
Eiusque corpus sumere
Atque devote colere
Possimus et diligere.

3. Gloria tibi, Domine,
Sumpto sub panis specie,
Cum patre et sancto spiritu
In sempiterna saecula.

Ad Vesperas.

1. Fratres, hic attendite
Mecumque obstupescite
Modum, quo nobis Dominus
Se tradidit absconditus.

2. Consecratus ab homine
Aeterni patris filius
Bibitur et manducatur
Et quidem non ab omnibus.

3. Nam sicut bonum satiat
Perfectumque sanctificat,
Sic malum fame cruciat
Animamque mortificat.

4. Fidenter tamen adeat

Ille, quem iam non mordeat,
Sed liberum se sentiat
Discussa conscientia.

5. Gloria tibi, Domine,
Sumpto sub panis specie,
Cum patre et sancto spiritu
In sempiterna saecula.

Ad Completorium.

1. Te lucis ante terminum,
Rerum creator, poscimus,
Ut per tuam praesentiam
Purgentur nostra vitia.

2. Procul recedant somnia
Et noctium phantasmata,
Ut digne te suscipere
Possimus et diligere.

3. Gloria tibi, Domine,
Sumpto sub panis specie,
Cum patre et sancto spiritu
In sempiterna saecula.