163. Recordare Aureum B.V.M.

1. Recordare, o Maria,
Peccatorum, hac in via

Pro his interveniens,
Scimus, quia tu es pia,
In caelesti hierarchia

Deum reconcilians.

2. Virgo casta et pudica,
Nos tuere in hac vita

Cogitatum dirigens,
Corda nostra sint contrita,
Sitque mens per te polita,

Hanc a vanis retrahens.

3. Mater regis tu caelorum,
Es regina angelorum,

Mediatrix populi,
Vota pia famulorum
Transfer, virgo, ad caelornm
Regna tui filii.
4. Cum steteris ante thronum
Trinitatis, angelorum

Circumdaris agmine,
Dulcis cantus sonat horum,
Coetus quoque hinc sanctorum
Te honorat sedule.

5. In conspectu regis veri
Per decorem speciei

Super omnes eminens,
Ultra omnes places ei,
Es propinqua eius sedi

Secum laete resides.
6. Dei plena divitiis
Virtute tui nominis,

Qua diceris Maria,
Tuis intende filiis,
Ne maculentur vitiis,

Quae essent his nociva.
7. Ut loquaris, quae sunt grata,
Prece tua natum placa,

Det salutem omnibus,
Et largire, advocata,
Nobis cuncta sint paccata,

Qui ad te confugimus.
8. Pro nobis te exponimus,
Ad Deum te transmittimus

Habentes in te fidem,
Quodcunque per te petimus,
In hoc exaudit filius

Mox suam genetricem.

9. Bona dabit caelestia,
Caduca haec terrestria,

Per omnia spernamus,
Aderit eius gratia,
Ut illi per haec tempora

Securi serviamus.
10. Et avertat temptamenta,
Quae sunt nobis nocumenta,

Mundi, carnis, daemonis,
Pia virgo, nos frequenta,
Nos conforta, nos sustenta

In cunctis periculis.

11. Indignationem Dei
Meruimus omnes rei,
Succurre celerius,
Nostri velit misereri,
Per te pie et mederi
Scelerum vulneribus.

12. Suam demum praesentiam,
Angelorum frequentiam

In morte nobis dabit,
Daemonum vehementiam
Horumque insolentiam

Mox procul effugabit.
13. A nobis fiat eminus
In fine nostri exitus,

Quidquid gravat animam,
Adesto, virgo, comminus,
Duc, ubi tuus filius

Patris tenet dexteram.
14. Amen semper exclamare
Libet teque invocare

Matrem Christi inclitam,
Ut a peste et a clade
Nos digneris conservare,

Vitam donans sobriam.