136. Super Ave Maria.

1. Ave, tu per angelum

magnum sumens Ave,
Modo per me miserum

sume parvum Ave,
Ut cum vultu placido

meum sumat Ave,
Tuo dilecto filio

funde tuum Ave.

2. O de Deo genita
genetrix Maria,
O curatrix omnium,
medela Maria,

O decus angelicum
gaudium Maria,

O regina virginum,
domina Maria.

3. Te divina gratia

mire procreavit,
Te virtutum gratia

privilegiavit,
Ventrem tuum gratia

prole fecundavit,
Cuius mira gratia

damnatos salvavit.

4. O plena munditiis,

cella puritatis,
O plena laetitiis,

porta pietatis,
O plena divitiis,

portus voluptatis,
O plena deliciis,

hortus ubertatis.

5. Te solam prae ceteris

Dominus dilexit,
Ultra sumens angelos,

Dominus te vexit,
Te dulcoris oculo

Dominus respexit,
De dulcoris pallio

Dominus contexit.

6. Nam in ventris alveo

requievit tecum,
Iacens in praesaepio

colludebat tecum,
Qui prius in stadio

laborabat tecum,
Nunc sedens in solio

gratulatur tecum.

7. Benedicto nomine

gaudens benedicta,
Nam Maria nomine

tu es benedicta,
Lumen Dei reserat

haec vox benedicta,
Tecum claudis nomine

tuo benedicta.

8. Tu es arca continens

manna beatorum,
Tu es virga dirigens

gressus viatorum,
Tu es urna aurea

claritate morum,
Tu geris in tabulis

verba praeceptorum

9. In te nova gratia
novo modo spirat,
Et in tua gratia
peccator respirat,

In tuis deliciis
devotus suspirat

Et in tuis meritis
ad regnum aspirat.

10. Tu in mulieribus

non habes reatum,
Tu in mulieribus

habes principatum,
Tu in mulieribus

tenes caelibatum,
Tu in mulieribus

paris Dei natum.

11. Tu primam et ultimam,

naturam unisti
Tu Deum et hominem

in ventre tulisti,
Angelos et homines

concordes fecisti,
Gratiam et gloriam

nobis invenisti.

12. Benedictus uterus,

de quo processisti,
Benedictus Dominus,

cui patuisti,
Benedictus filius,

quem tu genuisti,
Benedictus spiritus,

de quo concepisti.

13. Fructus tuus suavior

omni blandimento,
Fructus tuus dulcior

omni nutrimento,
Fructus tuus pulchrior

omni ornamento,
Fructus tuus carior

auro et argento.

14. Ventris tui lectulus

tactum viri nescit,
Ventris tui hortulus

gratia florescit,
Ventris tui flosculus

sopore dulcescit,
Ventris tui thalamus

liliis albescit.

15. Tui fructus gratiam

fac nos impetrare,
Tui fructus gloriam

da desiderare,
Tui fructus gratiam

da nos degustare,
Tui fructus praemia

da participare.

16. Amen dico rogans te

Iesu electricem,
Meam, quaeso, animam

praevaricatricem
Tuis sanctis precatibus

fac hostium victricem,
Et aeternis sedibus

tecum assistricem.