142. Super Ave Maria.

1. Ave, virgo dulcissima,

Virgo placens amabilis,
Ave, virgo pulcherrima,

Virgo genere nobilis,
Ave, virgo purissima,

Virgo, tota laudabilis,
Ave, virgo gratissima,

Virgo, mater mirabilis.

2. Maria, praeter opera

Carnis portasti Dominum,
Maria, mortis onera

Destruis, virgo virginum,
Maria, plus quam sidera

Refulges, salus hominum,
Maria, tu puerpera

Culmen transcendis ordinum.

3. Gratia sancti spiritus

Dulcem ornavit loculum,
Gratia Dei caelitus

Replevit habitaculum,
Gratia te divinitus

Transformavit in vasculum,
Gratia cuius ambitus

Attulit pacis osculum.

4. Plena fuisti gratia,

Plena caeli dulcedine,
Plena Deo dans omnia,

Plena divino flamine,
Plena desuper in via,

Plena manens in lumine,
Plena nunc es in patria,

Plena sedens in culmine.

5. Dominus, rex regnantium,

Contraxit amicitiam,
Dominus in sacrarium

Dulcem elegit filiam,
Dominus in hospitium

Tractus propter munditiam,
Dominus domicilium

Intrans et dans custodiam.

6. Tecum fuit infantulus

Inclusus in visceribus,
Tecum hic legis baiulus

Dignis portatus manibus,
Tecum dulcis puerulus

Ablactatus uberibus,
Tecum immensus parvulus,

Totus plenus dulcoribus.

7. Benedicta salubriter

Cunctis fulta virtutibus,
Benedicta totaliter

Carens cunctis criminibus,
Benedicta feliciter

Illustrata fulgoribus,
Benedicta perenniter

Et praefulgens honoribus.

8. Tu dulcis, felix femina,

Caeli digna fastigio,
Tu gloriosa domina,

Regali sedens solio,
Tu pusillorum intima

Dulcoris foves gaudio,
Tu caelestium agmina

Dulci reples solacio.

9. In nullis tanta puritas

Ab initio saeculi,
In nullis tanta dignitas

Signati dulcis hortuli,
In nullis sic fecunditas

Absque tactu signaculi,
In nullis haec nobilitas

Singularis vehiculi

10. Mulieribus haec pia
Praefertur singulariter,
Mulieribus socia
Se dat sororem dulciter,

Mulieribus gloria
Mater Dei veraciter,

Mulieribus curia

Caeli defert humiliter.

11. Et qui fructus puerperae

Mea dicet fragilitas,
Et quid possum describere,

Ubi fontalis bonitas,
Et qui d possum hic quaerere,

Ubi tanta profunditas,
Et quid possum plus dicere?

Doceas, felix trinitatis.

12. Benedictus superius

Est in caeli palatio,
Benedictus inferius

In mirando commercio,
Benedictus interius

In puellae triclinio,
Benedictus exterius

Omni dignus praeconio.

13. Fructus hic speciosior

Cunctis aliis fructibus,
Fructus iste suavior

Miris fragrans odoribus,
Fructus hic amabilior

Pius devotis mentibus,
Fructus hic efficacior

Dulcis marcens virtutibus.

14. Ventris matris praeclaritas

Relucet in ecclesia,
Ventris mira suavitas

Et odoris fragrantia,
Ventris dulcis felicitas,

Ubi Iesu praesentia,
Ventris felix haec novitas

Iunxit imis caelestia.

15. Tui corporis propria

Deo grata possessio,
Tui, virgo, sacrarii

Suavis contemplatio,
Tui templi eximii

Paradisus emissio,
Tui dulcis hospitii

Fructum miratur ratio.

16. Amen, Iesus dulcissimus,
Bonus essentialiter,
Amen, excelsus intimus,
Propinquus personaliter,

Amen, hic frater minimus,
Rubricatus pocnaliter,

Amen, ergo dignissimus,
Benedictus perenniter.

17. Maria, te suppliciter

Mea salutat parvitas,
Mater misericorditer

Recidas coronas perditas,
Ut laetemur feliciter,

Ubi dulcis iucunditas,
Regnemus aeternaliter,

Ubi iugis sollemnitas.
18. Per te donetur venia,

Sis expiatrix scelerum,
Sopiatur discordia

Sis reformatrix foederum,

Ad te clamat inopia,
Sis pia datrix munerum,

Nos coartat miseria,

Sis consolatrix pauperum.

19. Cupio, mater, cernere

Tui splendoris speciem,
Feliciter quiescere

Post timendum mortis diem,
Fac nos sursum ascendere

Ad illam dulcem requiem,
Dulcem Iesum respicere

Et eius gratam faciem.