1. De sanctissima Trinitate.

Ad Matutinum.

1. Quicunque vult animam

firmiter salvare,
Trinitatis gloriam

debet implorare,
Tres personas credere,

ipsas honorare,
Unum Deum dicere,

solum adorare,

A d Primam.

2. Trinitatem credimus:

summum genitorem,
Sanctum eius filium,

nostrum redemptorem,
Spiritum paraclitum,

gratiae datorem ;
Unum tamen dicimus

Deum creatorem.

Ad Tertiam.

3. In patre potentia

cuncta denotatur,
Nato providentia

omnis declaratur,
Universa bonitas

paraclito datur,
Qui cum patre, filio

simul adoratur.

Ad Sextam.

4. Patris beneplacito

filius est datus,
Est de sancto spiritu

de virgine natus,
Crucifixus, mortuus

atque tumulatus,
Resurgens a mortuis

caelo sublimatus.

Ad Nonam.

5. Vox a patre resonat

super baptizatum,
Ipsum vocans filium

dilectum et gratum,
In columbae specie

spiritum monstratum
Credimus super Iesum

et caelitus datum.

Ad Vesperam.

6. A se patrem credimus,

tamen generavit
Filium, de lumine

lumen resultavit,
Procedentem spiritum

uterque spiravit,
Neuter horum genuit

ipsum vel creavit.

Ad Completorium.

7. Et per ipsum erimus

omnes iudicati,
Beati ad gloriam

aeternam vocati,
Ad poenas perpetuas

mali condemnati,
Haec omnia credere

tenentur beati.

Conclusio.

8. Has horas sic recole,

ut in trinitate
Teneretur unitas,

et in unitate
Honoretur trinitas

in proprietate ;
Quisque debet credere

hoc cum firmitate.