63. De sancto Benedicto.

Ad Matutinum.

1. Benedictus opifex

hora matutina
Linquens mundi gaudia

quaesivit divina,
Literarum studiis

fultus ex doctrina,
In corde munitus est

Dei disciplina.

Ad Primam.

2. Hora prima femina,

quae nutrivit natum,
Quoddam capisterium

per hanc laceratum
Adduxit ad puerum

agens lamentatum,
Statim prece parvuli

fuit reformatum.

Ad Tertiam.

3. Hora terna iuvenis

quaesivit desertum,
Tribus annis remanens

locum tenet artum,
Ab aspectu hominum

se servans opertum,
In Dei servitio

fecit se expertum.

Ad Sextam.

4. Hora sexta factus est

pater monachorum,
Instruens et reprobans

regimen ipsorum,
Dant venenum bibere

pro cura laborum,
Sed ipse tam patiens

coetum liquit horum.

Ad Nonam.

5. Hora nona exiens

montes visitavit
Et claustra duodecim

in ipsis fundavit
Et bis sex in quolibet

monachos locavit
Et Deo quam plurimos

servos praeparavit.

Ad Vesperas.

6. Pater fugat daemones

hora vesperarum,
Coepit aquas ducere

de fonte petrarum,
Falcastrum extrahitur

de fundo aquarum,
Totum mundum cernere

splendore stellarum.

Ad Completorium.

7. Hora completorii

monachos vocavit,
Convocatis omnibus

eis praedicavit,
Finitis sermonibus

pater exspiravit,
Magna luce lampadum

ad caelos migravit.

Conclusio.

8. Salve, sancta trinitas,

mundi medicina,
Maiestate unitas,

in personis trina,
Te rogo suppliciter,

vera lux divina,
Meam mentem dirigat

tua disciplina.

9. Has horas recipias

tamquam salutamen
Huios ob memoriam,

quem tuum iuvamen
Duxit ad caelestia,

cuius supplicamen
Me tuae clementiae

recommendet. Amen.

10. Tu, qui laudes dixeris

has huius amore,
De quo versus facti sunt

in Dei honore,
Propter Christum Dominum

te deprecor ore,
Dicas Ave Maria

pro compositore.