75. De s. Maria Magdalena.

Ad Matutinum.

1. Mare magnum tu fuisti,

Peccatorum grandis spina.

Multis Deum offendisti
Hora quidem matutina,
Quibus eras nimis digna

Aeternis suppliciis

Et privari gaudiis,
Nisi esset medicina.

Ad Primam.

2. Ad te ergo rediisti

Conturbata acriter,
Hora prima ingemuisti
Ut columba fortiter,
Proponens finaliter
A deliciis abstinere,
De commissis paenitere,
Hinc vivendo aliter.

Ad Tertiam.

3. Gratia Christi illustravit

Te invisibiliter,
Hora tertia confortavit

Praestans spem feliciter,

Veniens celeriter
Apud fontem pietatis
Tuis veniam de peccatis

Postulasti humiliter.

Ad Sextam.

4. Domini pedes lavasti

Multis guttis lacrimarum
Hora sexta et purgasti
Capillis illecebrarum
Recordans deliciarum,
Oscula eis impressisti,
Caput eius perungisti
Effusione lacrimarum.

Ad Nonam.

5. Amor Christi te dilexit,
Hora nona respondendo

Septem daemones eiecit
De te ipsos puniendo,
Christi corpus perstringendo

Peccatorum remissionem,

Gratiae infusionem
Invenisti diligendo.

Ad Vesperas.

6. Laete Christus te dilexit,

Multis signis demonstravit,
Martham tuam sanam fecit,
Tuis precibus curavit,
Lazarum resuscitavit
Tibi iam compatiendo,
Primo apparens resurgendo
Apostolam consecravit.

Ad Completorium.

7. Elevata iuxta altare

Christum flendo respexisti,
Completorii hora care

Spiritum Deo reddidisti.

Tunc fragrantiam reliquisti
Septem dies, ut refertur,
Sic ut quisque miraretur,

Aromata excessisti.

Conclusio.

8. Assis mihi, Magdalena,

Istas horas decantando,
Indulgentiam ut benigna

De commissis impetrando,
Me hic servans a ruina

Ab insidiis liberando
Sis in obitu festina

Me in gloriam collocando.